Ka sinjale pozitive që luftës tregtare mes SHBA-së dhe Kinës mund t’i vijë fundi.
Në Gjenevë të Zvicrës Sekretari amerikan i Thesarit, Scott Bessent dhe përfaqësuesi amerikan i Tregtisë, Jamieson Greer filluan bisedimet tregtare me zëvendëskryeministrin kinez, He Lifeng.
Bessent paralajmëroi publikun më parë këtë javë që të mos presë një marrëveshje të madhe tregtare nga këto takime, por pranoi se ky ishte një hap i rëndësishëm.
Vendndodhja e saktë se ku po zhvillohen këto bisedime është mbajtur sekret, megjithëse agjencia e lajmeve Reuters e cila citon një dëshmitar thotë se ky takim po mbahet në një rezidence private në një periferi të Gjenevës.
SHBA-të kanë vendosur një tarifë prej 145% për shumicën e importeve kineze ndërsa Kina është kundërpërgjigjur me një tarifë prej 125% për shumicën e importeve amerikane.
Ekonomia amerikane tashmë ka filluar të ndjejë pasojat e para të kësaj lufte tregtare pasi u shënua tkurrja e parë tremujore që nga fillimi i vitit 20222 të prodhimit të brendshëm bruto.
Ndikimi i tarifave shumë të larta po ndihet ndjeshëm edhe në Kinë, eksportet e së cilës në SHBA ranë ndjeshëm në Prill.