Problemi me shkollën Todor Janev në Çashkë është zmadhuar nga momenti kur ministri i arsimit Jeton Shaqiri, i’a mori kompetencat kryetarit të komunës. Kështu u shpreh për Televizionin 21 deputeti i LSDM-së nga kjo zonë, Muhamet Kadriov. Kadriov thotë se zgjidhja më e mirë është të ndërtohet një shkollë tjetër për nxënësit shqiptarë.
“Zgjidhja është kjo. Së pari t’i kthehen ingerencat kryetarit të komunës. Pastaj ne si politikanë, faktorë të asaj zone, të ulemi dhe ta gjejmë një zgjidhje. Njëra zgjidhje është të ulemi me prindërit nga Çashka, mendoj se do të pranojnë, që derisa ta ndërtojmë shkollën në Banjicë, fëmijët të mësojnë aty. Vetëm se është hapur paralelja dmth. Të vazhdojnë në gjuhën shqipe derisa në Banjicë të bëjmë një objekt. Shkaku pse unë kam qëndruar indiferent është për shkak se kjo mori konotacion politik, jo ta zgjidhin problemin por të bëjnë problem mbi problem.”- deklaroi Muhamet Kadriov – Deputet i LSDM-së.
Mirëpo ministri I arsimit Jeton Shaqiri, dyshon nëse deputeti Kadriov e thotë atë që e ndjenë apo e thotë të vërtetën. Shaqiri thotë se Kadriov për katër vite deputet, asnjëherë nuk ndërmori asgjë për të zgjidhur problemin.
“Deputeti njëherë atë që e thotë, le ta mendojë a e thotë të vërtetën apo atë që e ndjenë personalisht sepse si deputet po I bën tanimë katër vjet, duhet të shohë çfarë ka ndërmarë për katër vjet. Unë jam minister rreth dy vite dhe nuk ka ardhë asnjë ditë deputeti deri te ministria e arsimit, për hapjen e një paralele në shkollën Todor Janev. I bëj thirrje deputetit që çdoherë ka thënë jo nuk është koha, jo nuk është situata por një ditë duhet të ishte ky diskutim që duhej hapur.”- tha Jeton Shaqiri – Ministër I Arsimit.
Deklaratat e deputetit Kadriov ka habitur edhe kryeparlamentarin Talat Xhaferi.
“Për keqardhje që lexoj sot rastësisht që deputeti I asaj zone nga radhët e LSDM-së, I përkatësisë shqiptare nga ajo zone që është zgjedhur nga ato qytetarë është bashkërenditur në pengim. Në kontekst të kompetencave qeveritare, në suaza të qeverisë është kompetencë, një pjesë komunale, pjesa tjetër e ministries. S’do mend që në bazë të rregullave dhe procedurave do të bëhen të gjitha veprimet që të sigurohet me çdo kusht që secili cep secili nxënës të shfrytëzojë të drejtën, me kusht që të meren kompetencat e komunave përkatëse.”- tha Talat Xhaferi – Kryetar I Kuvendit.
Përndryshe protestat në Çashkë filluan qysh para tre javëve, pasi në shkollën Todor Janev u mor vendimi për hapjen e paraleles shqipe. Deri tani nxënësit shqiptarë në këtë shkollë mësonin në gjuhën maqedonase. Prindërit protestues nuk lejojnë fëmijët e tyre të ndjekin mësimin, por gjithashtu pengojnë mësimdhënësit dhe drejtoreshën të kryejnë punën e tyre.