Reagimi i kryeministrit Edi Rama vjen pasi deputeti britanik Nigel Farage pranoi publikisht ftesën për të vizituar Shqipërinë dhe për të diskutuar marrëveshjen për kthimin e të burgosurve shqiptarë nga Mbretëria e Bashkuar
Kryeministri i Shqipërisë, Edi Rama, ka reaguar sërishme tone të ashpra dhe ironike ndaj deklaratave të fundit të Nigel Farage, i cili pretendon se “1 në 48 shqiptarë në Britani është në burg”.
Reagimi i Ramës vjen pasi Farage pranoi publikisht ftesën për të vizituar Shqipërinë dhe për të diskutuar marrëveshjen për kthimin e të burgosurve shqiptarë nga Mbretëria e Bashkuar.
Në një reagim të drejtpërdrejtë, Rama i drejtohet Farage-it me fjalët: “Nigel, Nigel, Nigel…”, duke e kritikuar për keqpërdorimin e statistikave dhe përhapjen e frikës ndaj shqiptarëve.
“Nga ‘një kriminel për çdo 50 shqiptarë’, tani ke arritur të thuash: ‘Ndoshta është një në tre, ndoshta një në katër, nuk e di…’. Vërtet nuk e di? Dhe kjo pas ‘kontrollit të dyfishtë të të dhënave’?!”, shkruan Rama me tone thumbuese.
Ai i referohet të dhënave të vetë gazetës The Telegraph, e cila pranon se analiza e saj “me gjasë ka nënvlerësuar popullsinë shqiptare në Britani”.
Ndërsa Rama përmend shifra shumë më të larta: sipas Ambasadës Shqiptare në Londër, në Mbretërinë e Bashkuar ndodhen mbi 300 mijë shqiptarë, shumë më tepër se 53 mijë sa përmendet në raportimet fillestare.
“Këta janë njerëz që mësojnë fëmijët tuaj, ndërtojnë shtëpitë tuaja, kujdesen për të moshuarit e të sëmurët tuaj. Nuk janë mish për dhëmbët e propagandës suaj post-Brexit”, thekson kryeministri.
Rama vazhdon me një pyetje të drejtpërdrejtë për Farage:
“Pse është kaq e vështirë të pranosh se je gabuar, pa tërhequr zvarrë një komunitet të tërë njerëzish të ndershëm dhe punëtorë që i shërbejnë vendit tënd me dinjitet, sikur të ishte vendi i tyre?”
Në mesazhin e tij, Rama mbron kontributin e komunitetit shqiptar në Britani, duke theksuar se “Britania është tashmë e madhe, dhe kjo jo pak falë diversitetit të saj, qëndrueshmërisë dhe forcës së saj multikulturore”.
“Një komb që vuan stresin politik pas një traume nuk ka nevojë për kokë turku. Nuk ka nevojë për goditje të lira. Dhe sigurisht që nuk ka nevojë për mite në vend të fakteve”.
Duke përmbyllur reagimin, Rama e fton Farage që vizita e tij në Shqipëri të mos jetë një mundësi për përçarje, por për dialog të ndershëm:
“Shpresoj me gjithë zemër që vizita jote në Shqipëri të të frymëzojë të luftosh për ide, jo kundër njerëzve – në frymën e traditës së madhe liberale që vendi yt e ka përfaqësuar ndër shekuj. Pres me kënaqësi të të mirëpres si të ftuarin tim të nderit në vendin tonë të bukur. Por përpara se të shijosh diellin e vërtetë dhe mikpritjen tonë të sinqertë, a mund të biem dakord që të flasim për fakte, jo për fantazitë e tua post-truth?”