Komisioni Qendror Zgjedhor i Bosnjë e Hercegovinës ka marrë një vendim unanim për t’ia hequr mandatin Milorad Dodikut si president i Republikës Srpska
Komisioni Qendror Zgjedhor i Bosnjë e Hercegovinës (CIK BiH) ka marrë një vendim unanim për t’ia hequr mandatin Milorad Dodikut si president i Republikës Srpska, pas dënimit të formës së prerë me një vit burg dhe ndalimit për gjashtë vjet nga ushtrimi i funksioneve publike.
Avokati i tij, Goran Bubiç, ka njoftuar se do të kërkojë pezullimin e përkohshëm të vendimit dhe do të ankimojë në Gjykatën Kushtetuese, çka e lë vendimin ende jo të plotfuqishëm.
Për të ruajtur pozitat politike, Dodik dhe partia SNSD kanë propozuar formimin e një “qeverie të unitetit kombëtar” me opozitën në Republikën Srpska, por kjo e fundit ka refuzuar ftesën, duke kujtuar fyerjet e mëhershme të Dodikut.
Ndërkohë, Qeveria e entitetit serb ka mbajtur një mbledhje urgjente, ku ka miratuar tetë konkluzione, mes tyre kundërshtimin e vendimit të gjykatës dhe një apel për mbështetje ndaj Dodikut.
Pritet që së shpejti të mblidhet edhe Kuvendi Kombëtar i Republikës Srpska për të shqyrtuar krizën institucionale që ka shpërthyer pas vendimit të CIK-ut.