Koalicioni qeveritar VLEN, që pretendon të sjellë “ndryshim” dhe “vlera të reja”, po tregohet çdo ditë e më shumë si një kopje e përkeqësuar e pushteteve të diskredituara të së kaluarës. Në një zhvillim shqetësues, është zbuluar një grup komunikimi (në WhatsApp), që i përket ekipit të PR-it të partisë VLEN, ku qartë dokumentohet se aty përgatiten deklarata të montuara, shpifje dhe skenarë të rremë ndaj kundërshtarëve politikë.
Në këtë grup, siç dëshmohet edhe nga pamje konkrete, koordinohen sulme të organizuara, shpërndahen të pavërteta dhe krijohen manipulime mediatike me një qëllim të vetëm: të mashtrohet qytetari, të fabrikohet realiteti dhe të krijohet huti në opinionin publik. E gjitha kjo në emër të propagandës, të mbështetur jo nga individë të thjeshtë, por nga figura zyrtare, përfshirë zëvendësministra, ministra dhe deputetë, të cilët, sipas informacioneve të siguruara, janë pjesë aktive e këtij grupi.
Kjo nuk është më thjesht një çështje etike. Kemi të bëjmë me një skandal politik, që prek drejtpërdrejt parimet e demokracisë, lirinë e fjalës dhe të drejtën e qytetarëve për t’u informuar saktë. Kur një parti në pushtet përdor burimet e veta për të prodhuar lajme të rreme dhe deklarata të manipuluara, atëherë kemi një abuzim të pastër me pushtetin, që kërkon reagim të menjëhershëm nga institucionet dhe shoqëria civile.
VLEN, në vend që të qeverisë me dinjitet dhe transparencë, ka zgjedhur të ndjekë hijen e Artan Grubit, duke përdorur taktika që përçajnë dhe helmojnë opinionin publik. Kjo sjellje nuk përfaqëson vlerat që pretendohet se mbrohen. Përkundrazi – përbën një kthim mbrapa, drejt një klime politike të shantazhit dhe mashtrimit.
Në një shoqëri demokratike, deklaratat e rreme dhe montimet nuk mund të trajtohen si vegla të zakonshme politike. Ato janë sulme ndaj vetë së vërtetës. Dhe kur ato burojnë nga një strukturë qeveritare, problemi nuk është më vetëm moral – por sistemik dhe institucional.
Është koha që opinioni publik, mediat e pavarura dhe faktorët ndërkombëtarë t’i kushtojnë vëmendje kësaj çështjeje. Heshtja në këtë rast do të thotë pranim i një realiteti ku e vërteta nuk ka më vlerë.
