Një takim i rëndësishëm i zyrtarëve gjermanë të forcave ajrore është përgjuar nga rusët për shkak të një gabimi individual, ka insistuar ministri gjerman i Mbrojtjes, Boris Pistorius.
Ai ka thënë se hetimi ka përjashtuar mundësinë se një spiun rus ka marrë pjesë në thirrjen telefonike, raporton BBC.
Pistorius ka thënë se thirrja telefonike është publikuar për shkak se njëri nga telefonuesit kishte thirrur në një linjë të pasigurt, përcjell gazeta online Reporteri.net.
Kjo ia ka mundësuar Rusisë që të zbulonte bisedën, ka thënë ministri gjerman.
Në incizime, katër zyrtarë të lartë të ushtrisë dëgjohen duke diskutuar për mundësinë që Ukraina të përdorë raketat gjermane Taurus për të goditur urën e Kerchit që lidh Rusinë me Krimenë.
Kancelari gjerman Olaf Scholz vazhdimisht ka përjashtuar mundësinë që shteti gjerman të armatos Ukrainën me raketat Taurus.
Kanali shtetëror RT në Rusi ka publikuar audioincizimin gjatë javës së kaluar.
Në një konferencë për media të martën, Pistorious ka deklaruar se njëri nga pjesëmarrësit ka marrë pjesë nëpërmjet një lidhje të paautorizuar. Për këtë, rusët kanë mundur të përgjonin gjithë bisedat.
Pistorious ka konfirmuar se ka nisur një hetim në lidhje me këtë përgjim.
Kremlini e ka cilësuar incizimin si provë se Perëndimi është përfshirë direkt në luftën në Ukrainë.