Shkup, 19 gusht 2025 – Akademikja dhe aktivistja Maja Najçevska publikoi një kërkesë publike për falje drejtuar Petar Bogojeskit, pas kërkesës ligjore të bërë nga ky i fundit për një status në Facebook ku ajo e kishte quajtur “budalla si biçikletë”.
Najçevska theksoi se fjalët e saj kanë qenë të papërshtatshme dhe krahasimi ofendues, por njëkohësisht nënvizoi se qëndrimet e Bogojeskit nuk janë shprehje e “budallallëkut”, por përfaqësojnë gjuhë të vetëdijshme urrejtjeje dhe nxitje të konfliktit ndëretnik.
“Krahasimi ishte i gabuar, problemi është më i thellë”
“Me këtë postim publikisht kërkoj falje për atë që kam thënë. Në statusin tim është përdorur gjuhë e papërshtatshme dhe një krahasim i papërshtatshëm. Nuk bëhet fjalë për budallallëk, por për një diskurs të vetëdijshëm të urrejtjes dhe nxitje të konfliktit ndëretnik”, shkruan Najçevska.
Ajo kujton se Bogojeski publikisht e ka cilësuar si “gjueti shtrigash” procedimin e Prokurorisë ndaj tifozëve që bërtisnin parullat “Shqiptari i mirë është shqiptari i vdekur” dhe “Dhoma e gazit për shqiptarët”, duke i portretizuar ata si “patriotë të rinj”.
Thirrje për veprim të Prokurorisë
Najçevska i bën thirrje Prokurorisë Publike që të fillojë procedurë kundër Bogojeskit për gjuhë urrejtjeje dhe nxitje të konfliktit etnik, duke kujtuar se ky nuk është rast i izoluar, por një model i përsëritur dhe i qëllimshëm.
“Shpeshherë paraqitjet e tij publike janë me përkrahje të hapur për ide profashiste. Gjuha e urrejtjes është vetë e rrezikshme, por kur përdoret në mënyrë të vazhdueshme nga një profesor i Akademisë Ushtarake, ajo bëhet tepër e rrezikshme dhe kërkon reagim urgjent,” tha ajo.
“Nuk është budalla, por i rrezikshëm”
Në përfundim, Najçevska e përsëriti faljen e saj për fyerjen personale ndaj Bogojeskit, por e quajti atë “një njeri i rrezikshëm për shoqërinë demokratike dhe për bashkëjetesën multietnike në Maqedoni”.
“Edhe njëherë e përsëris kërkesën time për falje që e quajta Petar Bogojeskin ‘budalla’. Ai nuk është budalla, por një njeri i rrezikshëm për shoqërinë demokratike që po ndërtojmë dhe për komunitetin multikulturor në Maqedoni, të bazuar në respektimin e dallimeve,” theksoi Najçevska.