Për shkak të inateve politike, Isen Shabani, drejtor i çerdhes “Pranvera” në Komunën e Vrapçishtit, ka reaguar ndaj akuzave të Ministrisë për Politika Sociale, Demografi dhe Rini. Ai ka demantuar çdo akuzë të pabazë lidhur me shkeljet e të drejtave të fëmijëve në këtë çerdhe, duke theksuar se është Inspektorati dhe Ministria që kanë marrë kompetencat e Komunës për emërimin e drejtorit dhe kanë bërë shkelje të ligjit.
Shabani ka shpjeguar se Ministria ka shkelur të drejtat e fëmijëve duke emëruar drejtor nga radhët e edukatoreve, duke lënë grupin e fëmijëve pa edukatore për një periudhë prej gati 10 ditësh. Ai theksoi se ky veprim është në kundërshtim me Ligjin për Mbrojtjen e Fëmijëve dhe rregulloret për funksionimin e çerdheve. Po ashtu, Shabani ka theksuar se nuk është shpallur konkurs për plotësimin e vendeve të lira të punës, siç kërkohet nga ligji.
Në lidhje me akuzat për heqjen e veturës që përdoret për shpërndarjen e ushqimit dhe ndërprerjen e energjisë elektrike, Shabani ka demantuar këto akuza dhe ka deklaruar se ato janë të pabaza, duke theksuar se ngarkimi i Komunës për këto çështje është një shpifje dhe mund të çojë në padi.