Ai e përshkroi këtë objektiv si një “mision të brezave” për popullin hebre, duke e vendosur rolin e tij politik në një kornizë që, sipas tij, tejkalon kufijtë e kohës dhe të politikës së përditshme
Kryeministri izraelit Benjamin Netanyahu ka deklaruar se e sheh veten në një “mision historik dhe shpirtëror” për të realizuar vizionin e “Izraelit të Madh” – një koncept që përfshin territore përtej kufijve aktualë të Izraelit.
Në një intervistë për kanalin i24 News, Netanyahu tha se ky vizion përfshin jo vetëm zonat që aktualisht janë të parashikuara për krijimin e një shteti palestinez, por edhe pjesë të Jordanisë dhe Egjiptit.
Ai e përshkroi këtë objektiv si një “mision të brezave” për popullin hebre, duke e vendosur rolin e tij politik në një kornizë që, sipas tij, tejkalon kufijtë e kohës dhe të politikës së përditshme.
Sipas Netanyahu-t, ky mision ka një dimension “historik” që lidhet me trashëgiminë dhe aspiratat shekullore të popullit hebre, si dhe një aspekt “shpirtëror” që e shikon si pjesë të detyrës së tij personale dhe kombëtare.
Deklaratat e tij pritet të shkaktojnë reagime të forta ndërkombëtare, pasi koncepti i “Izraelit të Madh” është i lidhur ngushtë me zgjerimin territorial dhe konteston kufijtë e njohur ndërkombëtarisht.
Këto komente vijnë në një çast tensionesh të larta në rajon dhe mund të interpretohen si sinjal i një qasjeje më agresive në politikën e Jashtme dhe territoriale të Izraelit.
Përpos kësaj, sytë e botës janë për një zgjidhje të situatës në Gaza, ku Netanyahu, përkundër paralajmërimeve, ka vendosur ta pushtojë ushtarakisht Rripin.