Shkup — Ish-presidenti i Maqedonisë së Veriut, Stevo Pendarovski, ka dhënë një vlerësim kritik për njëvjetorin e ardhshëm të qeverisë së Hristijan Mickoskit, duke e cilësuar si një periudhë të mbushur me paaftësi, keqmenaxhim dhe devijime serioze nga vlerat demokratike.
Në një intervistë për Deutsche Welle, Pendarovski shprehu habi për shkallën e centralizimit të pushtetit në duart e kryeministrit dhe injorimin e ministrave të tjerë, të cilët sipas tij janë kthyer në figura dekorative. Ai veçoi disa raste alarmante, si nënshkrimi i marrëveshjes për borxh me Mbretërinë e Bashkuar nga Ministri i Transportit, jo nga Ministri i Financave, si dhe emërimi i personave pa kualifikime bazike në pozicione kyçe të sigurisë kombëtare.
Pendarovski kritikoi gjithashtu presionin e drejtpërdrejtë të kryeministrit ndaj prokurorisë publike dhe ndërhyrjen e hapur në Këshillin Gjyqësor, duke e cilësuar këtë si tentativë për kapjen e drejtësisë nga mazhoranca aktuale. Ai e krahasoi këtë periudhë me regjimin autokratik të Nikola Gruevskit, por theksoi se për herë të parë vendi përballet me një qeveri që “nuk ka asnjë synim të qartë në asnjë fushë kyçe, përfshirë edhe politikën e jashtme”.
Në fokus të kritikës ishte edhe kredia hungareze prej një miliard eurosh, e cila sipas tij po shpërndahet në mënyrë të pakriter për projekte të vogla si çerdhe dhe rrugë lokale. “Këto nuk janë investime strategjike dhe nuk kanë fuqi për të ndikuar në rritjen ekonomike të vendit,” tha ai.
Për projektin e korridorit 10, i cilësuar si strategjik nga qeveria, Pendarovski vuri në dukje një dimension tjetër: krijimi i një zone ekonomike të përbashkët me Serbinë dhe Hungarinë – dy vende që nuk ndjekin rrugën demokratike të BE-së dhe NATO-s. Ai theksoi se bashkëpunimi intensiv me liderë si Viktor Orbán dhe Péter Szijjártó është një sinjal i qartë për një devijim politik drejt modeleve joliberale. “Në pesë muajt e fundit kemi pasur pesë herë më shumë takime me Orbanin dhe Szijjarton sesa me gjithë përfaqësuesit e tjerë të BE-së së bashku,” theksoi ai.
Sipas Pendarovskit, kjo është një rrugë e rrezikshme që vendos Maqedoninë e Veriut gjithnjë e më larg standardeve të vendeve demokratike dhe më afër regjimeve me orientim autoritar.