Ish-presidenti i Maqedonisë së Veriut, Stevo Pendarovski, ka hedhur dyshime serioze mbi natyrën e marrëveshjes së fundit të ratifikuar midis Shkupit dhe Londrës, duke deklaruar se nuk bëhet fjalë për një marrëveshje strategjike, siç është prezantuar publikisht.
Në një intervistë për Deutsche Welle, Pendarovski tha se dokumenti që është miratuar në Kuvend të mërkurën është një memorandum bashkëpunimi ose letër qëllimesh, dhe jo një marrëveshje e mirëfilltë strategjike.
“Në përmbajtje, ai tekst nuk përmban asgjë strategjike. Janë përmendur katër fusha për bashkëpunim, për të cilat duhet të formohen grupe pune dhe të saktësohen projektet që mund të financohen – me kredi britanike për projekte infrastrukturore në Maqedoninë e Veriut”, tha Pendarovski.
Ai shtoi se mund të ketë një marrëveshje të dytë në të ardhmen, e cila mund të trajtojë aspektet strategjike të marrëdhënieve me Mbretërinë e Bashkuar, por kjo aktuale nuk është ajo.
“Kjo nuk është marrëveshje strategjike. Është thjesht një parim për t’u ulur dhe për të parë se çfarë ju nevojitet për kreditim”, përfundoi Pendarovski.