Në Dhomat e Specializuara të Kosovës (DHSK) në Hagë nuk do të ketë seanca të enjten dhe të premten ashtu siç ishte planifikuar në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.
Por, ish-presidenti i Kosovës, Hashim Thaçi nuk mori pjesë në seancën e ditës së djeshme për shkak të problemeve shëndetësore.
Këtë e njoftoi në fillim të seancës, avokati i tij, Luka Misetiq, i cili tha se Thaçi nuk ndihej mire dhe se nuk kishte informacione të tjera pasi nuk ka komunikuar me të.
Të shqetësuar për gjendjen shëndetësore të Thaçit janë shprehur edhe nga Organizata e Veteranëve të Luftës të Ushtrisë Çlirimtare të Kosovës.
Përmes një reagimi ata kanë kërkuar nga Gjykata Speciale që të japë një raport të qartë e zyrtar në lidhje me gjendjen shëndetësore të ish-presidentit Thaçi.
“Kërkojmë nga Gjykata Speciale që të japë një raport të qartë dhe zyrtar mbi gjendjen shëndetësore të ish-presidentit Thaçi dhe bashkëluftëtarëve tanë që po mbahen padrejtësisht në paraburgim që mbi katër vite”, thuhet në reagimin e tyre.
Të indinjuar janë shprehur edhe për faktin e mosreagimit të institucioneve të Kosovës për gjendjen shëndetësore të Thaçit.
“Jemi të indinjuar me heshtjen e institucioneve të Kosovës, të cilat jo vetëm që nuk po reagojnë ndaj shkeljeve të Gjykatës Speciale, por nuk po e mbajnë as të informuar opinionin publik për gjendjen shëndetësore të tyre”, thuhet në reagim. /Zëri
