Kryeministri izraelit Benjamin Netanyahu pritet t’i propozojë kabinetit të sigurisë politike një plan për të aneksuar zona në Rripin e Gazës, në një përpjekje për të mbajtur ministrin e Financave Bezalel Smotrich në qeverinë e tij.
Sipas planit, Izraeli do të deklarojë se po i jep Hamasit disa ditë për të rënë dakord për një armëpushim, dhe nëse jo, do të fillojë aneksimin e zonave të Rripit.
Lëvizja do t’u paraqitet anëtarëve të kabinetit pas vendimit të Netanyahu-t për të rritur ndihmën humanitare që hyn në Rrip, i cili u pranua pavarësisht kundërshtimit nga partia e Sionizmit Fetar.
Sipas planit që Netanyahu pritet të paraqesë, hapësirat në zonën tampon do të aneksohen të parat, të ndjekura nga zonat në Rripin verior ngjitur me qytetet izraelite të Sderot-it dhe Ashkelon-it.
Procesi do të vazhdojë gradualisht derisa të aneksohet i gjithë Rripi.
Sipas detajeve të paraqitura nga Netanyahu në bisedimet me ministrat, plani ka marrë miratimin nga administrata Trump.
Kryetari i Sionizmit Fetar, Smotrich – i cili ende nuk e ka trajtuar publikisht rritjen e ndihmës për banorët e Gazës – shpjegoi pse ai nuk po del nga rreshti: “Ne po promovojmë një veprim të mirë strategjik mbi të cilin nuk është e këshillueshme të elaborohet për momentin. Në një kohë të shkurtër, do të dimë nëse është i suksesshëm dhe ku po shkojmë”.
Kërcënimi për të aneksuar zona në Rrip, së bashku me deklaratat e shumë ministrave të qeverisë për nevojën për të krijuar vendbanime në Gaza, do ta vendosë Izraelin në një kurs përplasjeje me bashkësinë ndërkombëtare, përveç Shteteve të Bashkuara.
Me shumë gjasa, një deklaratë e tillë do të hapë gjithashtu portat që vendet të njohin një shtet palestinez, pas njoftimit të njohjes nga Franca javën e kaluar. Kjo gjithashtu mund të çojë në vendosjen e sanksioneve ndaj Izraelit.
Netanyahu nuk ishte më parë entuziast për aneksimin e territoreve, por në një përpjekje për të shpëtuar qeverinë e tij, ai është i gatshëm të marrë në konsideratë promovimin e një plani të tillë.