Nënkryetarja e Forumit të Gruas dhe anëtare e Kryesisë Qendrore të Aleancës për Shqiptarët krahu i Taravarit, Naime Islami Zeqiri, është distancuar publikisht nga vendimi i kryetarit të partisë, Arben Taravari, për t’u larguar nga koalicioni qeveritar dhe bashkëpunimi me VLEN-in.
Përmes një deklarate të fuqishme në rrjetet sociale, ajo ka kritikuar vendimin e Taravarit, duke e cilësuar si të njëanshëm, të paarsyetuar dhe në kundërshtim me vlerat dhe parimet për të cilat ajo dhe shumë të tjerë janë angazhuar.
“Të thuash ‘JO’ është një akt guximi, sidomos kur kjo ‘JO’ është qëndrim ndaj një vendimi që shkel mbi parimet tona dhe mbi kauzën për të cilën kemi luftuar me përkushtim dhe kemi sakrifikuar,” ka shkruar Islami Zeqiri.
Ajo shprehet e zhgënjyer nga drejtimi që ka marrë lëvizja politike dhe paralajmëron se nuk mund të heshtë përballë një vendimi që, sipas saj, i nënshtrohet përfitimeve dhe kalkulimeve personale, në vend të interesit të qytetarëve.
“Kam qëndruar përkrah Aleancës me bindjen se kjo ishte një lëvizje që përfaqësonte shpresën dhe vullnetin për ndryshim. Vendimi i fundit për t’u tërhequr nga qeverisja, pa një sqarim të plotë dhe pa përgjegjësi ndaj qytetarëve që na besuan, përbën një kthesë të gabuar,” thekson ajo.
Zeqiri thotë se nuk largohet nga partia që e ka ndërtuar me përkushtim, por nuk pranon të mbështesë një drejtim që, sipas saj, devijon nga qëllimi fillestar. Ajo u bën thirrje strukturave të ASH-së që të tregojnë përgjegjësi dhe të japin sqarime të qarta për qytetarët.
“Qytetarët meritojnë vendime të bazuara në parime, jo në llogari politike. Është koha të flasim hapur dhe të qëndrojmë me ata që ende besojnë se politika është mjet për t’u shërbyer njerëzve, jo për t’i manipuluar ata,” përfundon reagimin e saj Naime Islami Zeqiri.