Nënkryetari i Aleancës për Shqiptarët, Berat Jakupi tha se, kjo parti është themeluar me gjak dhe sakrificë por që u përdor për tenderat e Dushko Pavlevski, që Jakupi tha se është person i lidhur me interesat më të errëta dhe korruptive në Komunën e Gostivarit.
“Aleanca për Shqiptarët parti e cila u themelua me gjak dhe sakrificë
Si një nga shumë themelues të Aleancës për Shqiptarët, ndjej obligim të flas hapur për ngjarjet tronditëse që kanë ndodhur së fundmi në Komunën e Vrapçishtit. Incidenti ku Dushko Pavlevski, një njeri i lidhur me interesat më të errëta dhe korruptive në Komunën e Gostivarit, guxoi të hyjë me forcë në zyrën e kryetarit Isen Shabani, është një tregues i qartë se diçka thellësisht e gabuar po ndodh.
Ky Pavlevski ka qenë përfitues i të gjitha tenderave në Gostivar dhe ka përvetësuar tokat publike për interesa private. Por çfarë është edhe më tronditëse për mua, si nënkryetar i Aleancës për Shqiptarët dhe dikush që kam sakrifikuar për këtë parti, është fakti që ish-bashkëpartiaku ynë, Arben Taravari, ka shërbyer në hije për këtë njeri.
Unë kurrë nuk do të kisha imagjinuar se partia që e themeluam bashkë me Ziadin Selën, me vizionin për të luftuar për drejtësi dhe barazi për shqiptarët, do të shërbente si platformë për të pasuruar njerëz si Dushko Pavlevski. Ne nuk e ndërtuam këtë parti që të jemi mjet për përfituesit e korrupsionit, as për të mbrojtur interesa të ngushta që dëmtojnë qytetarët tanë”, tha Jakupi.