Ndryshimet në Kodin Penal e shpëtuan Janakieskin në rastin “Toplik”, Prokuroria hoqi dorë nga ndjekja për shkak të vjetërimit!

Në seancën e parë kryesore në Gjykatën Penale të Shkupit për rastin “Toplik”, pasi Apeli e ktheu lëndën në rigjykim, prokurori publik hoqi dorë nga ndjekja e mëtutjeshme e të pandehurve për shkak të implikimeve të ndryshimeve të fundit kontroverse në Kodin Penal, transmeton Portalb.mk.

Rasti “Toplik” ka të bëjë me shitjen e tokës ndërtimore për ndërtimin e vendbanimit Sonçev Grad në Sopishtë, në të cilin i pandehuri i parë ishte ish-ministri i Transportit dhe Lidhjeve Mile Janakieski.

Siç kumtoi sot Gjykata Penale e Shkupit, prokurori publik në seancën e sotme riklasifikoi veprën që u ngarkohet të akuzuarve nga paragrafi 5 i nenit 353 të Kodit Penal në paragrafin 4 të të njëjtit nen.

Ndryshe, me ndryshimet në Kodin Penal, neni 353 pësoi ndryshime thelbësore, u zvogëluan dënimet e parapara, u vendos kufiri i sipërm dhe disa paragrafë u fshinë.

Një fat të tillë e pësoi paragrafi 5, i cili i referohej keqpërdorimit të pozitës dhe autoritetit zyrtar, i cili u hoq me ligjin e ndryshuar dhe sipas të cilit ndiqeshin penalisht të pandehurit në rastin “Toplik”.

Pas riklasifikimit të veprës, prokurori publik ka hequr dorë nga ndjekja e mëtutjeshme e të pandehurve për shkak të vjetërimit.

“Për interes të mediave dhe organizatave joqeveritare që ndjekin punën e gjykatës, njoftojmë opinionin se sot u mbajt seanca e parë kryesore për rastin me KOK-in nr.161/23, të caktuar nga prokuroria si ‘Toplik’, pasi kthimin e saj në rigjykim nga gjykata e shkallës së dytë, prokurori publik ka kryer rikualifikimin e veprës penale të ngarkuar me të pandehurit: M.J., T.Gj., D.D., M.T., D.G. dhe V.T. nga neni 353 paragrafi 5 deri në nenin 353 paragrafi 4, dhe në drejtim të ndryshimeve në Kodin Penal. Në bazë të kësaj, prokurori publik ka hequr dorë nga ndjekja e mëtutjeshme e të pandehurve për shkak të vjetërimit në kuptim të nenit 352 të Ligjit për Procedurën Penale, për të cilin gjykata pas marrjes së vendimeve përkatëse me shkrim do t’i dërgojë në palët”, thuhet në deklaratën e Gjykatës Themelore Penale Shkup.

Ndryshe, më 17 tetor të këtij viti, Gjykata e Apelit në Shkup ka njoftuar se ka marrë vendim me të cilin pranon ankesat e Janakieskit dhe pesë të akuzuarve të tjerë në këtë rast dhe e anulon aktgjykimin e shkallës së parë.

Sipas njoftimit, Gjykata e Apelit e ka marrë vendimin më 6 shtator, në të njëjtën ditë kur Kuvendi miratoi ndryshimet e diskutueshme në Kodin Penal, të cilat ulin dënimet për krimin e shpërdorimit të pozitës dhe autoritetit zyrtar dhe vendosin një kufi të sipërm. .

Subjekti “Toplik” ka të bëjë me shitjen e tokës ndërtimore për ndërtimin e vendbanimit Sonçev Grad në Sopishtë.

Aktgjykimi i shkallës së parë Gjykata Themelore Penale Shkup e ka marrë më 5 prill 2022, me të cilin Janakieski është dënuar me tre vjet e gjashtë muaj burg. Tome Gjurçillovski, i cili ishte kryetar i Komisionit për tenderë publikë në Ministrinë e Transportit dhe Lidhjeve, është dënuar me 3 vjet burg. Për katër të tjerët (Dimitar Dimovski, Marica Taseva, Dimitar Gaçev dhe Vesa Tomçevska), gjykata i dënoi me burgim me kusht prej dy vjetësh, të cilat nuk do të zbatohen nëse brenda pesë viteve nuk kryejnë vepër të re.

Ndryshe, “Toplik” ishte pjesë e listës së çështjeve të publikuara nga Koalicioni joqeveritar “Të gjithë për një proces të drejtë” për të cilat vjetërimi do të ndodhë pas ndryshimeve në Kodin Penal.

Sipas aktakuzës, vepra penale keqpërdorim i pozitës dhe autoritetit zyrtar për të cilin janë akuzuar Janakieski dhe të akuzuarit e tjerë është kryer nga 3 prilli 2007 deri më 18 shkurt 2013, që do të thotë se vjetërimi absolut sipas llogaritjeve ka ndodhur në shkurt 2023.

Janakieski aktualisht është duke vuajtur një dënim me burg prej tre vjet e gjashtë muaj për rastin Titanik. Në korrik të këtij viti, ai u dërgua në burg nga paraburgimi, pasi u deklarua fajtor për pothuajse të gjitha krimet që lidhen me parregullsitë zgjedhore në rastin “Titanik”, përveç krimit të keqpërdorimit të fondeve për financimin e një fushate zgjedhore, por më vonë Prokuroria hoqi dorë nga ndjekja penale për këtë krim.

lajmet e fundit

Goditet nga energjia elektrike, humb jeten 19 vjeçari nga Shkupi

Në ora 23:43 në SPB Shkup është raportuar se L.L (19) nga Shkupi ka ndërruar jetë në një festë në shtëpi. Sipas raportit, pas...

Presidentja Osmani mikpret këngëtaren me famë botërore Bebe Rexha

Presidentja e Kosovës, Vjosa Osmani ka pritur sot në takim këngëtaren e njohur me famë botërore Bebe Rexha. E para e shtetit Vjosa Osmani...

Zbardhet vrasja në Debresh! Arrestohen tre persona, konfiskohet arma dhe vetura

Ministria e Punëve të Brendshme ka njoftuar se është zbardhur vrasja në Debresh të Gostivarit, ku janë arrestuar tre persona dhe ndaj të cilëve...

Pas 13 ditëve në flakë, shuhet zjarri në malin Serta

Zjarri afër Sertës është shuar tërësisht pas 13 ditëve luftë me stihinë e zjarrit, informoi sot komandanti i Njësisë territoriale zjarrfikëse Negotinë, Stole Atanasov. Situata...

Aksident në Kumanovë, dy të lënduar rëndë

Një aksident ka ndodhur këtë pasdite në Kumanovë. Nga terreni mësohet se dy vajza janë lënduar rëndë, pasi u ndeshën me një veturë tjetër...

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu