Numri i rasteve të dhunës në familje ka marrë përmasa shqetësuese në vendin tonë, pasi çdo ditë persona të ndryshëm përfundojnë në pranga si të dyshuar për dhunë ndaj familjarëve.Këto raste bëhen edhe më të rënda, kur viktima janë prindërit të cilët përjetojnë dhunë psikike e fizike nga fëmijët e tyre.
Një rast i tillë i dhunës në familje është regjistruar të dielën në fshatin Votomiricë të Pejës, ku një nënë ka përfunduar në Spitalin Rajonal pas një sulmi fizik nga djali i saj.Burime të Gazetës Sinjali bëjnë të ditur se i dyshuari në këtë rast është R.M, 29 vjeçar, ndërsa viktima është H.B, 55 vjeçar.
Sipas dëshmisë së viktimës dhënë në polici, i biri është kthyer në shtëpi dhe pas një debati verbal për një mesazh të dërguar, e ka sulmuar fizikisht, duke e goditur disa herë mbi tavolinë. Pas incidentit, ai është larguar për një moment dhe është kthyer me dorën e lënduar dhe me gjakderdhje, çka ka alarmuar familjarët, të cilët kanë ndërhyrë dhe kanë dërguar të dyshuarin për trajtim mjekësor.Më pas, edhe viktima është shoqëruar në emergjencë dhe më tej në stacionin policor për të dhënë deklaratë. Ajo ka deklaruar se kjo nuk është hera e parë që përjeton dhunë psikike e fizike nga djali i saj, dhe se rastet e mëparshme janë raportuar në Polici.
Lidhur me këtë rast, është njoftuar Prokurori i Shtetit, i cili ka urdhëruar inicimin e rastit “Dhunë në familje”, ndërsa i dyshuari është liruar në procedurë të rregullt. Rasti është nën hetim nga njësitë përkatëse policore.
Ndodhi në Pejë: Djali e sulmon nënën për një mesazh
