Një mësuese nga një shkollë fillore në Shkup paralajmëron se edhe në Maqedoni po përhapet masivisht një sfidë e rrezikshme në TikTok midis nxënësve. Ajo bëri thirrje përmes portalit maqedonas “Lokalno” prindërve që të jenë të kujdesshëm me fëmijët e tyre, pasi ata po e provojnë sfidën e humbjes së vetëdijes, e cila mund të ketë pasoja serioze.
“Nuk e di saktësisht si quhet sfida, por fëmijët thonë se e kanë parë në TikTok. Ata shtypin diafragmën e tyre deri sa të humbin vetëdijen. Ndonjëherë e bëjnë këtë njëri-tjetrit, ndonjëherë vetë. Por ka pasur një rast kur një fëmijë ka qëndruar pa ndjenja për një kohë më të gjatë, kështu që kanë pasur nevojë ta spërkatin me ujë dhe të thërrasin dikë për ndihmë,” rrëfeu mësuesja.