Kreu i PDK-së reagon fuqishëm pas skandalit në Maqedoninë e Veriut: “Shqiptarët nuk do të lejojnë askënd t’i nëpërkëmbë më!”
Kryetari i Partisë Demokratike të Kosovës, Memli Krasniqi, ka reaguar me tone të ashpra ndaj thirrjeve skandaloze dhe urrejtëse “vdekje për shqiptarët” dhe “dhoma gazi për shqiptarët”, që u dëgjuan gjatë një ndeshjeje sportive në Maqedoninë e Veriut, në prani të Kryeministrit maqedonas Hristijan Mickoski dhe përfaqësuesve të qeverisë së re.
Në një deklaratë publike, Krasniqi e ka cilësuar këtë ngjarje si një akt ekstremist që dëmton bashkëjetesën ndëretnike dhe minon themelet demokratike të shtetit fqinj.
“Thirrjet ‘vdekje për shqiptarët’ e ‘dhoma gazi për shqiptarët’, të bëra në një palestër sportive në Maqedoninë e Veriut, në prani të Kryeministrit Mickoski dhe delegacionit qeveritar, janë të rënda e të papranueshme dhe dëmtojnë bashkëjetesën në këtë shtet dhe përtej tij,” deklaron ai.
Mesazh i qartë për Qeverinë në Shkup dhe për “kumbarrën” nga Prishtina
Memli Krasniqi kërkon një reaksion të qartë e të prerë nga Qeveria e Maqedonisë së Veriut, duke theksuar se heshtja në këso raste nuk është neutralitet, por miratim i urrejtjes.
“Qeveria e Maqedonisë së Veriut ka përgjegjësi të distancohet qartë nga çdo akt ekstremist, sepse heshtja konsiderohet miratim.”
Por goditja më e drejtpërdrejtë shkon përtej Shkupit – drejt Prishtinës. Pa përmendur emrin, por qartazi duke aluduar në kryeministrin në largim, Albin Kurti, Krasniqi e quan “kumbara” të kësaj qeverie dhe e mban përgjegjës për klimën anti-shqiptare që po thellohet në Maqedoni.
“Ashtu si një tjetër heshtje që po bëhet gjithnjë e më zhurmshme: ajo e Kryeministrit në ikje të Kosovës, që si kumbara i kësaj qeverie në Shkup, mban përgjegjësi morale dhe politike për këtë klimë anti-shqiptare që po thellohet dita-ditës.”
Krasniqi e mbyll deklaratën me një mesazh të fuqishëm për të gjithë ata që mendojnë se mund të vazhdojnë të përçmojnë shqiptarët, duke kujtuar se ata janë komb shtetformues në Maqedoninë e Veriut dhe partnerë kyç në proceset euroatlantike.
“Dinjiteti dhe mirëqenia e çdo komuniteti nuk janë të negociueshme. Heshtja përballë gjuhës fashiste është qëndrim – andej dhe këndej kufirit! Shqiptarët kanë bërë shumë për këtë shtet dhe nuk do të lejojnë askënd t’i nëpërkëmbë më.”