A u mbyllën se po mbahet premtimi për luftën kundër bixhozit, apo se nuk i plotësonin më kushtet për ta mbajtur licencën për shkak të mospagimit të detyrimeve në Drejtorinë e të Ardhurave Publike? Cila është e vërteta për marrjen e licencave dy kompanive të bixhozit?
Izet Mexhiti dje vendimin e paraqiti si “kalim në veprim kundër kumarit”, duke shtuar se po “fillon procesi i rrënimit të perandorisë së kumarit” dhe se “Qeveria e re fillon me realizimin premtimit se do ta heqim kumarin nga shtëpitë, familjet dhe fëmijët tanë”.
Por në njoftimin e Qeverisë për këtë nuk e proklamojnë si nisje e luftës kundër bixhozit, por sqarojnë se mbyllja vjen si vendim i Ministrisë së Financave, “për marrje të licencës për organizimin e lojërave të fatit në klub automatik të lëshuar për Shoqërinë për Prodhim, Tregti dhe Shërbime “ARENA GAMING” Strumicë”.
Pas kësaj, në një komunikatë me shkrim, nga VLEN e përshëndetën propozimin e Ministrisë së Financave dhe vendimin e Qeverisë për, siç shkruajnë, të hequr dy licencat e para për kazinotë që nuk e kanë respektuar ligjin”.
I pyetur për këtë në emisionin e sotëm DailyClick, zëvendëskryeministri për qeverisje të mirë dhe transparencë, Arben Fetai, tha se marrja e licencave për ato që s’kanë paguar detyrimet është një prej mënyrave për mbyllje, gjersa sqaroi edhe planin e Qeverisë se si do të shkohet deri në mbylljen e kazinove.
Nga koalicioni VLEN kumtojnë se kërkesa për interpretim autentik që e kanë dorëzuar në Kuvend, do të mundësojë mbylljen e kazinove online dhe do të krijojë parakushte ligjore për përgjegjësinë e të gjithë ish-zyrtarëve që me vendime të papërgjegjshme sollën lojërat e fatit.