Deklarata e eurokomisares për zgjerim dhe integrim, Marta Kos, gjatë samitit të djeshëm në Shkup, ka ngjallur reagime të shumta për mënyrën se si ajo përshkroi identitetin maqedonas.
Në një moment të fjalimit të saj, Kos u përpoq të japë një përkufizim të identitetit përtej debateve politike dhe historike, duke e përqendruar atë në elementet kulturore dhe gastronomike:
“Identiteti maqedonas është edhe tava me fasule, pindxhuri, specat e mbushur, veshjet tradicionale…”
Kjo mënyrë e të shprehurit u përball me kritika në opinionin vendas, ku shumë e panë si një banalizim të temës së ndjeshme të identitetit kombëtar. Në rrjetet sociale, komentues të ndryshëm e cilësuan deklaratën si një përpjekje për të “shmangur thelbin e çështjes”, duke reduktuar një çështje komplekse në ushqim dhe zakone.
Megjithatë, Kos theksoi se qëllimi i saj ishte të nënvizonte vlerën e trashëgimisë kulturore në rrugën drejt Bashkimit Europian, duke theksuar se këto elemente janë pjesë e rëndësishme e mozaikut europian.
Deklarata e saj vjen në një kohë kur Maqedonia e Veriut përballet me sfida të mëdha në rrugën drejt anëtarësimit në BE dhe në një klimë ku debati për identitetin është veçanërisht i ndezur.