Fatkeqësia që po ndodh prej gati një muaji me zjarret e furishme ka shkatërruar 5% të territorit të përgjithshëm të Maqedonisë së Veriut, vlerësojnë nga LSM-ja dhe fajin për këtë ia hedhin qeverisë, duke kërkuar përgjegjësi për siç thonë, dështimin në përballjen me zjarret. Nga partia e Filipçes kërkojnë dorëheqje të menjëhershme të ministrit të Brendshëm, Pançe Toshkovski.
LSDM disa herë ka bërë apel se Toshkovski është i paaftë për të menaxhuar shtabin e krizës dhe patjetër të zëvendësohet.
“Koordinimi i keq me avionët dhe veprimi i ngadaltë i institucioneve, për të cilin kemi paralajmëruar prej ditësh, rezulton të jetë dështimi më i madh i Komitetit Drejtues për sistemin e menaxhimit të krizave që menaxhon Toshkovski. Toshkovski dështoi plotësisht në parandalimin si dhe në kapjen e zjarrvënësve. Krahas përgjegjësisë së Toshkovskit, Qeveria duhet të ndryshojë të gjithë mënyrën e veprimit. Të gjitha institucionet të fokusohen në krizën e zjarrit, për të siguruar një efikasitet dhe funksionim më të madh të kanaleve të ajrit. Një kryeministër i përgjegjshëm dhe një ministër i përgjegjshëm, në këtë situatë, duhet të jenë çdo ditë në shtabin e krizës dhe duhet të menaxhojnë institucionet dhe nuk duhet t’i shohim të merren vetëm me PR dhe promovime ditore politike. LSDM në të kaluarën është sjellë në mënyrë konstruktive dhe të përgjegjshme, nuk ka dashur të ushqejë tensionin dhe të sulmojë Qeverinë, duke i lënë institucionet të bëjnë punën. Por gjendja me të cilën po përballet vendi është tepër e rëndë dhe në masë të madhe pasojë e sjelljes së papërgjegjshme të VMRO-DPMNE-së dhe Qeverisë”, thuhet në reagimin e LSDM-së.