Mendoj se figurat politike si Arben Travari nuk duhet të mirëpriten krahapur dhe me entuziazëm në ndonjë krah politik, për shkak të lëvizjeve të dyshimta që ka bërë gjatë karrierës së tij.Atij iu desh një vit për ta përçarë Aleancën, ndërsa atij iu desh më pak se një vit për ta përçarë edhe atje ku shkoi, te VLEN-i., dhe nuk është e çuditshme të ndodhë e njëjta gjë edhe në rreshtimin e radhës.
Në retrospektivë, ai ka pasur ndikim negativ në unitetin e blloqeve politike ku ka qenë pjesë. Ndaj, në Frontin Evropian, këto zhvillime po ndiqen me vëmendje. Çdo eksponent brenda Frontit ka qëndrimin e vet për këtë çështje, dhe unë po shpreh mendimin tim personal.
Besoj se duhet të jemi të kujdesshëm ndaj politikanëve me sjellje të paqëndrueshme ose me karakteristika të personaliteteve të shumëfishta. Nëse një figurë si Travari ka reflektuar vërtet mbi veprimet e tij, atëherë duhet të kërkojë falje publike dhe të japë dorëheqje nga funksionet politike – kjo do të ishte një shenjë e sinqeritetit dhe e reflektimit real. Në të kundërt, nëse nuk e bën këtë, atëherë kuptojmë që kemi të bëjmë me një person që thjesht po ndryshon “xhaketën” për të vazhduar lojën e vjetër politike, në dëm të shoqërisë dhe qytetarëve.