Kryeministri Edi Rama ka folur në Konferencën e Ambasadorëve, që po zhvillohet në Tiranë në datat 26-28 gusht.
Gjatë fjalës së tij, Rama ka zbuluar se Samiti i NATO-s do të zhvillohet në Tiranë në vitin 2027, ndërsa vitin e ardhshëm Shqipëria mikpret liderët e 44 shteteve.
Koha YouTube Channel
“Vitin e ardhshëm do të jemi vendi që do të mikpresë liderët e 44 shteteve europiane nga Britania e Madhe në Ukrainë apo nga Suedia, Norvegjia deri në Turqi, në samitin e Komunitetit Politik Europian. Do të jemi mikpritës të samitit të NATO-s në 2027. Gjëra që as nuk mund të imagjinoheshin vite më parë. Që Shqipërisë ti besoheshin të tilla role”, tha Rama.
Ndër të tjera, Kryeministri tha se Shqipëria duhet të jetë gati për t’u ulur në tryezën e BE-së në 2030 dhe për këtë roli i ambasadorëve është tepër i rëndësishëm.
“E dimë shumë mirë që 2030 duhet të na gjejë në gatishmëri të plotë për t’u ulur në tryezën e BE-së si anëtarë të barabartë të familjes europiane. Ne duhet të jemi gati. Është shumë më e lehtë të thuash e shumë më e vështirë ta bësh sepse kërkon që gjithcka që kemi bërë deri tani ta konsideorjmë një stad ku mund dhe duhet të ngjitemi në një nivel të ri. E për këtë arsye duhet me patjetër që trupi ynë diplomatik të ngjitet në një nivel të ri”, shtoi Rama.