Kryetari i Partisë Demokratike të Kosovës (PDK), Memli Krasniqi, ka reaguar sërish pas dështimit të nëntë për konstituimin e Kuvendit, duke theksuar se partia e tij është gjithmonë e gatshme të ulet për të diskutuar për Kosovën, por kurrë nuk do të heshtë përballë bllokadës, paaftësisë apo mungesës së vullnetit për zgjidhje.
“Ne jemi këtu për Kosovën. Dhe për Kosovën, ulemi gjithmonë. Por kurrë s’do të heshtim. Jo përballë bllokadës. As përballë paaftësisë. E as për mungesën e vullnetit për zgjidhje. Perdet ranë. Dhe me to, edhe një tjetër tentativë për viktimizim. Sheshit po shihen bllokuesit. Po zbulohen edhe taktizuesit me fatin e qytetarëve”, ka shkruar Krasniqi në Facebook.
Ai ka theksuar se koalicioni VV dhe Lista Guxo nuk i ka numrat për të zgjedhur kryetarin e Kuvendit dhe se PDK nuk fshihet pas asgjëje.
“Imponimet tek ne nuk kalojnë…PDK është dhe do të mbetet gjithmonë këtu, duke respektuar besimin dhe mandatin e qytetarëve. Për Kosovën, për të ardhmen!”, ka theksuar kreu i PDK-së.