Qeveria izraelite ka rritur presionin ndaj Hamasit me një paralajmërim të ashpër, duke i kërkuar lëvizjes islamiste palestineze që të pranojë propozimin amerikan për armëpushim dhe lirimin e pengjeve që mban që nga sulmi i 7 tetorit 2023, ose përndryshe do të përballet me pasoja ekstreme.
Kërcënimi vjen në një kohë kur Izraeli përballet me një presion të madh ndërkombëtar lidhur me ofensivën e tij të vazhdueshme në Rripin e Gazës dhe gjendjen e rënduar humanitare në këtë territor të rrethuar.
Presidenti i SHBA-së, Donald Trump, deklaroi se armëpushimi është ‘shumë afër’, duke lënë të kuptohet se përpjekjet diplomatike për ndaljen e përkohshme të luftimeve janë në një fazë vendimtare. Marrëveshja, e njohur si ‘marrëveshja e Witkoff’, sipas emrit të të dërguarit të posaçëm presidencial për Lindjen e Mesme, Steve Witkoff synon të sjellë një ndalim të luftimeve në këmbim të lirimit të pengjeve nga ana e Hamasit.
Ministri izraelit i Mbrojtjes, Israel Katz, deklaroi se operacionet ushtarake po vazhdojnë me intensitet të plotë.
Ai theksoi gjithashtu se ushtria po punon për të larguar popullsinë civile nga zonat e përfshira nga luftime, duke përsëritur paralajmërimin ndaj Hamasit.
“Vrasësit e Hamasit tani duhet të zgjedhin: do të pranojnë kushtet e ‘marrëveshjes së Witkoff’ për lirimin e pengjeve ose do të zhduken”, tha Katz në një deklaratë të drejtpërdrejtë dhe pa ekuivok.
Situata në Gaza mbetet e tensionuar dhe e paqëndrueshme, me zhvillime që mund të ndryshojnë nga dita në ditë, ndërkohë që bota po ndjek me shqetësim përshkallëzimin e dhunës dhe përpjekjet për një zgjidhje diplomatike. Syri.net-