Kryetari i Lëvizjes Demokratike, Izet Mexhiti pjesë e koalicionit VLEN ka folur për partnerin e tij, Arben Taravarin e Aleancës për Shqiptarët.
I pyetur se cila do të jetë oferta e fundit për Taravarin, Mexhiti tha se ata janë që VLEN të qëndrojë si unitet, ndërkaq shtoi se nëse ASh del nga VLEN, ose duhet të shkojë vetë në zgjedhje ose të përfundojë në “kthetrat e BDI-së”.
“Për hir të unitetit, për hir të bashkimit, sepse ne jemi të fokusuar te fitorja e radhës. Do të thotë se pjesa e lojës e para ne e kemi fituar, tash është pjesa e dytë e lojës nëse e marrim si futboll dhe e cila nuk ka reprizë. Tash është se kur do t’i fitojë komunat për të dëshmuar legjitimitetin si VLEN dhe mendoj se nuk i kemi komoditetin për t’u matur në mes vete, për të garuar me njëri – tjetrin.
Çfarë thotë oferta?
Mendoj se kemi vlerë, si pjesë e VLEN-it. Në momentin që dalim nga VLEN-i, ne jemi në shërbim të tjetër kujt. O duhet të del vetë Taravari dhe të bëhet faktori i tretë, që është e dëmshme për defaktorizim të votës shqiptare, që nuk besoj se do të jetë vetë, sepse është hapi i parë për ta mjegulluar anëtarësinë e vet sepse fundi do të jetë te kthetrat e Bashkimit Demokratik për Integrim”, tha Mexhiti në ClickPlus.