Irani njoftoi të enjten se materiali i pasuruar bërthamor mbetet “nën rrënojat” e objekteve të goditura gjatë luftës së fundit me Izraelin.
Ministri iranian i Jashtëm, Abbas Araghchi, gjatë një interviste televizive, deklaroi se Organizata Bërthamore e Iranit po vlerëson gjendjen dhe mundësinë e aksesit në këtë material për t’i raportuar Këshillit Suprem të Sigurisë Kombëtare.
Presidenti amerikan Donald Trump ka pohuar vazhdimisht se sulmet ajrore dhe raketore të SHBA-ve ndaj Iranit në qershor “shkatërruan” objektet bërthamore të vendit, edhe pse disa agjenci të inteligjencës amerikane kanë mbajtur një qëndrim më të kujdesshëm.
Irani mohon se kërkon të zhvillojë armë bërthamore dhe thotë se pasurimi i uraniumit është për qëllime paqësore.
Vlerësimet e inteligjencës amerikane kanë qenë më të kujdesshme, me një raport paraprak të rrjedhur të Agjencisë së Inteligjencës së Mbrojtjes që arrin në përfundimin se, ndërsa të tre vendet – në Fordow, Natanz dhe Isfahan – u dëmtuan rëndë, ato nuk u shkatërruan plotësisht.