Nënkryetari i Aleancës për Shqiptarët, Berat Jakupi tha se skandali në aeroportin e Shkupit ku pati një incident ndaj presidentes së Kosovës, Vjosa Osmani, ështe tregues i qartë i politikave nënçnuese të VMRO-DPMEN-së ndaj shqiptarëve. Jakupi tha se nga VLEN nuk ka pritshmëri pasi sipas tij, ata kanë dëshmuar se nuk kanë vullnet dhe kapacitet për t’i mbrojtur shqiptarët.
“Skandali i djeshëm në aeroportin e Shkupit, ku sigurimi tentoi të kontrollojë çantën dhe telefonin e presidentes së Kosovës, zonjës Osmani, është një tregues i qartë i politikave nënçmuese të VMRO-DPMNE ndaj shqiptarëve. Politikat e tyre diskriminuese reflektojnë në çdo pore të jetës së përditshme dhe kanë ndikuar deri tek rojtari i thjeshtë i aeroportit.
Këto veprime të ulëta nuk janë vetëm një sulm ndaj presidentes Osmani, por edhe ndaj gjithë shqiptarëve. Ato janë pasqyrë e një mentaliteti që ka zënë rrënjë thellë në shoqërinë maqedonase, ku urrejtja dhe diskriminimi ndëretnik janë bërë normë. Politikat e VMRO-DPMNE janë përgjegjëse për këtë situatë dhe është koha që ata të mbajnë përgjegjësi për pasojat e veprimeve të tyre.
U bëj thirrje udhëheqësve të VMRO-DPMNE të reflektojnë dhe të ndryshojnë qasjen e tyre ndaj qytetarëve shqiptarë. Këto veprime të papërgjegjshme nuk i shërbejnë askujt dhe vetëm nxisin urrejtje dhe ndasi. Është në interesin e të gjithë qytetarëve të Maqedonisë së Veriut që të ndërtojmë një shoqëri të bazuar në respekt dhe barazi.
Përsa i përket partisë shqiptare në pushtet, VLEN, nuk kam asnjë pritshmëri. Ata kanë treguar qartë se nuk kanë as kapacitetin dhe as vullnetin për të mbrojtur shqiptarët, dhe aq më pak për të kushtëzuar VMRO-DPMNE që të ndryshojnë qasjen e tyre. Mungesa e veprimit të tyre është një dështim i madh për të gjithë shqiptarët në Maqedoninë e Veriut.
Nuk mund të pranojmë më që të trajtohemi si qytetarë të dorës së dytë në vendin tonë. Është koha për një reflektim të thellë dhe për ndryshime të vërteta që do të garantojnë barazi dhe respekt për të gjithë qytetarët, pavarësisht nga përkatësia etnike. Kërkojmë që të gjithë qytetarët të ngrihen kundër këtyre politikave të padrejta dhe të luftojnë për një të ardhme më të drejtë dhe më të barabartë”, tha Jakupi.