Në kalanë së Ulqinit, nxënësit e shkollës së mesme profesionale të tekstilit nga Tetova prezantuan sfilatën “Identiteti i gdhendur”, e para që u paraqit jashtë vendit, me veshje të punuara me dorë nga vetë ata. Secili përfaqësonte një figurë apo ngjarje të rëndësishme historike.
“U paraqita me veshjen e Fan Nolit, rilindësit, ku në pjesën e veshjes kemi punuar me materiale bas. Në punimet e veshjeve kemi përdorur qëndisje, teknikat e stampimit të fotografive si dhe ngjyrosje.”
“Unë jam paraqitur me veshjen e Gjergj Fishtës, e cila tregon se pa marrë parasysh të krishterë apo myslimanë, ne jemi të gjithë shqiptarë. Kemi bërë portrete me vizatime të thjeshta, qëndisje, ngjyrosje.”
“Unë jam paraqitur me rilindësin Konstantin Kristoforidhi. Procedura zgjati deri një javë.”
“Sot u paraqita me alfabetin e parë shqip, konkretisht me Naum Veqilharxhin, që quhet Avetar dhe kemi bërë stampimin e shkronjave të vjetra, nuk ka qenë shumë e vështirë për ne që e punojmë këtë punë, diku 3-4 muaj.”
Ishin rreth 15 nxënës të viteve të treta dhe katërta, që me punën e tyre, bënë krenarë edhe profesorët që i mbështesin në sfilatën e ndarë në dy pjesë.
“Pjesa e parë është rilindësit tanë shqiptarë dhe pjesa e dytë është pjesa tradicionale që i bashkon të gjithë trojet shqiptare, domethënë tradicionalja e modernizuar”, tha Hyrije Alili.
“Me frymëzim dhe kreativitet kanë sjellë ne jetë figura të ndërtuara të rilindjes shqiptare përmes veshjeve artistike, secili element, secili detaj është një homazh për idealin qëndresën dhe vizioni e rilindësve tanë”, tha Xhemsie Xhelili.
E drejtori i shkollës e cilësoi sfilatën si një projekt edukativ, kulturor dhe artistik me misionin për ta prezantuar shkollën “Gjoce Stojçeski” përtej kufijve.
“Shqiptarët, pos qyteteve bregdetare në Shqipëri që i vizitojnë ne kemi menduar që të bëhet edhe një përkrahje për qytetin e Ulqinit, edhe kalaja e Ulqinit, dhe përshtatja e terrenit të cilin ne e kemi analizuar me profesorët që duhet ta përgatisin sfilatën dhe ramë në përfundim që kalaja e Ulqinit është shumë e kapshme që të mbahet sfilata”, deklaroi Muzafer Livoreka.
Projekti u mbështet edhe nga Komuna e Tetovës, ndërsa drejtori i sektorit për arsim, Nazmi Dauti u shpreh se nuk do të përfundojnë këtu përpjekjet për të ndihmuar shkollat me aktivitete të tilla.