Haqim Ramadani ka njoftuar dorëheqjen e tij nga posti i drejtorit të Inspektoratit për Vetëqeverisje Lokale, duke e shoqëruar vendimin me një mesazh të fortë emocional dhe simbolik për lidhjen e tij me komunën që përfaqëson.
Në reagimin e tij, Ramadani theksoi se vendlindja dhe qytetarët e tij janë mbi çdo pozitë dhe interes politik.
“Si diamanti që është i vogël, por me vlerë të madhe, ashtu edhe komuna jonë është e vogël në madhësi, por e madhe në vlerë!
Siç kanë bërë burrat e vërtetë dikur, edhe unë sot deklaroj me krenari se, kur është në pyetje banori im – kudo që ndodhet – unë qëndroj pranë tij.
Prandaj, me nder e dinjitet, jap dorëheqje nga posti i drejtorit ku kam qenë deri më tani, sepse mbi çdo detyrë dhe pozitë, për mua qëndron KOMUNA IME!”
Në fund të reagimit, Ramadani shtoi se dashuria për komunën e tij është më e madhe se çdo qytet apo ambicie personale:
“Komuna ime është shpirti im! Ajo për mua është më e madhe se Tetova, Shkupi, Çairi e Kumanova së bashku – sepse aty rreh zemra ime dhe aty fillon dashuria ime për vendin.”