Gjykata Penale akoma nuk ka sjell vendim nëse shtetasi i Kosovës, Blerim Ramadani i cili aktualisht ndodhet në paraburgim, plotëson kushtet për ekstradim ose jo. Ministria e Drejtësisë njoftoi shkurt se për të nisur procedura, duhet vendimi i Gjykatës i cili sipas praktikave të deritanishme nuk merret edhe aq shpejtë.
“Ne vetëm jemi njoftuar nga Ministria e Brendshme se personit Blerim Ramadani i është caktuar masa e paraburgimit ekstradues prej 30 ditëve. Ministria e Drejtësisë do të sjell vendim atëherë kur gjykata do të vërteton se janë plotësuar kushtet ligjore për ekstradim”, njoftojnë nga Ministria e Drejtësisë.
Nga Gjykata Penale thonë se për një vendim të tillë ka kohë. Ministria e Jashtme e Kosovës ka njoftuar se do të përdorë të gjitha kanalet diplomatike për të siguruar lirimin e Blerim Ramadanit. Nga atje njoftuan se Ambasada e Kosovës në Shkup është angazhuar me ekip të ekspertëve juridikë për lirimin sa më të shpejtë të Ramadanit dhe kthimin e tij në familje. , thuhet në komunikatën për media të Ministrisë së Punëve të Jashtme dhe Diasporës. Blerim Ramadani u arrestua më 17 korrik në vendkalimin kufitar të Jazhincës, bazuar në një flet-arrest nga Gjykata e Beogradit, përmes Interpol Serbia, me pretendimin për krime lufte në vitin 1999 në rajonin e Nerodimes. Arrestimi i tij nxiti reagime institucionale dhe politike në të dyja vendet, ndërsa të shtunën në Shkup para Gjykatës Penale u mbajt protestë nga ana e familjarëve dhe veteranëve të UÇK-së të cilët kërkuan lirimin e tij. Pas Gafurr Dugollit i arrestuar në mars të vitit 2016, arrestimit të Tomor Morinës në korrik të vitit 2019, Blerim Ramadani është shtetasi i tretë i Republikës së Kosovës i cili në cilësinë e ish ushtarit të UÇK-së arrestohet me flet-arrest ndërkombëtarë më kërkesë të autoriteteve serbe.