Një ngjarje që duket e marrë nga skenari i një filmi hollivudian ka tronditur Gjermaninë. Një grup grabitësish ende të paidentifikuar kanë depërtuar në trezorin e një banke të Sparkasse në Gelsenkirchen dhe kanë marrë para, ar dhe sende me vlerë që, sipas vlerësimeve të para, kapin shumën marramendëse prej rreth 30 milionë euro.
Autorët kanë arritur të thyejnë rreth 3.000 kasaforta, ndërsa dyshohet se rreth 90% e tyre janë plaçkitur plotësisht. Vjedhja është zbuluar pasi u aktivizua një alarm, ndërsa skena brenda bankës është përshkruar si “tronditëse dhe e paprecedentë”.
Para bankës janë mbledhur qindra qytetarë të dëshpëruar, shumë prej të cilëve kishin aty kursimet e jetës, trashëgimi familjare apo objekte me vlerë sentimentale. Nuk kanë munguar tensionet dhe shpërthimet emocionale.
Policia gjermane ka nisur një operacion të gjerë hetimor. Dyshohet se autorët kanë qenë burra dhe janë larguar me një Audi RS6 me targa të Hanoverit, por deri tani nuk ka asnjë të arrestuar dhe asnjë gjurmë të sigurt.
Ndërkohë, një tjetër dramë po ndiqet paralelisht: vetëm vlerat deri në rreth 10,300 euro rezultojnë të siguruara automatikisht. Për shumat më të larta kërkohet polica e veçantë sigurimi, duke lënë mijëra qytetarë në ankth se mos humbasin përgjithmonë pasurinë e tyre.
Ngjarja është cilësuar si një nga grabitjet më të mëdha bankare ndonjëherë në Gjermani – e organizuar, brutale dhe e pabesueshme në përmasë. Hetimet vazhdojnë, ndërsa publiku pret përgjigje… dhe drejtësi.