Gazetari nga Maqedonia e Veriut, Furkan Salihu, ka folur mbi incidentin në Aeroportin e Shkupit, ku ishte përfshirë presidentja Vjosa Osmani,
Salihu tha se nga informacionet që ka marrë nga personat që kanë qenë në vendngjarje, që sipas tij, janë pjesë e sigurimit të aeroportit, versioni i dhënë nga ta përputhet me versionin e MPB-së maqedonase se Osmani ka refuzuar t’i nënshtrohet kontrolleve.
“Nga kontaktet që i patëm me personat që kanë qenë në vendngjarje, që janë pjesë e sigurimit të aeroportit, versioni i tyre përputhet me atë që e thotë ministria e Punëve të Brendshme, se presidentja ka refuzuar t’i nënshtrohet kontrollit, edhe pse udhëtimi ka qenë privat dhe se aeroporti s’ka qenë i lajmëruar se është një udhëtim zyrtar”.
“Me këtë rast, presidentja do të duhej që ta kalonte bagazhin apo çantën dhe pajisjet e tjera elektronike nëpër skaner, sipas rregullores. Nuk e ka bërë këtë dhe më e keqja është kontakti fizik që anëtarët e sigurimit të presidentes e kanë pasur me sigurimin e aeroportit. U fol edhe për armë dhe kërcënime nga ana e pjesëtarëve të sigurimit të kryetarit të kuvendit të Maqedonisë së Veriut, Afrim Gashi”, tha Salihu në “Info Magazine”, njofton Klankosova.tv.
Më tej, gazetari Salihu tha se gjithë kjo situatë ka mundur të mos ndodhte nëse nuk aktorët e përfshirë nuk do të vinin në pikën ku flitet se janë nxjerrë edhe armët, gjë për të cilën thotë se nuk janë akuzuar policët e Kosovës por sigurimi i kryetarit të kuvendit të Maqedonisë së Veriut, Afrim Gashit.
“Nuk janë akuzuar policët e Kosovës që i kanë nxjerr armët, por pjesëtarët e sigurimit të kryetarit të kuvendit. Nëse nuk do të ishte kështu, nuk do të ishte përfshirë edhe prokuroria”.
“Nëse ishte paraqitur udhëtimi i presidentes me të gjitha protokollet, është përgjegjësi edhe e Maqedonisë së Veriut siguria e presidentes Osmani dhe nuk do të kishte nevojë që të vinin deri në këtë situatë”, tha ai.