Ministrja Elisa Spiropali ka reaguar me ashpërsi pas incidentit të rëndë gjatë një ndeshjeje basketbolli në Kumanovë, Maqedonia e Veriut, ku u dëgjuan thirrje skajshëm fyese dhe përjashtuese ndaj shqiptarëve. Ajo e ka cilësuar ngjarjen si të papranueshme dhe si një kujtesë brutale se rruga drejt një shoqërie të drejtë dhe gjithëpërfshirëse kërkon angazhim të vazhdueshëm.
“Nuk ka vend për gjuhë urrejtjeje që nxit dhunë, konflikt etnik dhe racizëm – aq më pak në sport, që në thelb mbart frymën e bashkimit, bashkëpunimit dhe respektit ndaj tjetrit,” – u shpreh Spiropali.
Ajo përshëndeti reagimet e institucioneve të Maqedonisë së Veriut, por kërkoi më shumë: një qëndrim publik më të fortë nga zyrtarët më të lartë të shtetit. Sipas saj, bashkëjetesa ndëretnike nuk është vetëm një vlerë për Maqedoninë e Veriut, por një gur themeli për rrugëtimin e përbashkët europian të rajonit.
“Shqipëria dhe shqiptarët janë të palëkundur në mbështetjen e një bashkëjetese shembullore, larg urrejtjes dhe ndasive të vjetra që s’kanë më as modë, as ngjyrë,” përfundoi ajo.