Arben Fetai ka reaguar ashpër pas zhvillimeve të fundit politike, duke akuzuar drejtuesit e Aleancës për Shqiptarët për tradhti dhe bashkëpunim me strukturat e vjetra politike. Në një deklaratë të fortë, ai shprehet se “Doktori” dhe “Pacienti” janë vënë në shërbim të rehabilitimit të Ali Ahmetit dhe rrjetit të tij 22-vjeçar të hajnisë dhe tradhtisë.
“Doktori dhe Pacienti nisën fushatën dorë për dorë, duke mbështetur rehabilitimin e Aliut dhe gjithë rrjetit të hajnisë dhe tradhtisë 22-vjeçare. Asnjëherë nuk kam pasur dyshimin më të vogël se Doktori është marrë peng nga Aliu,” – shkruan Fetai.
Ai tregon se janë ndërmarrë hapa për të mbrojtur Aleancën nga, siç e quan ai, “kthetrat e Aliut”, duke akuzuar drejtuesit aktualë për një marrëveshje të turpshme që, sipas tij, do të thellohet edhe më tej në ditët në vijim.
“Pas këtij normalizimi të turpshëm të sotëm, hapi i radhës do të jetë edhe më i ulët, edhe më i gërditshëm. Film i vjetër me një aktor të ri,” – shkruan Fetai në reagimin e tij.
Ai gjithashtu i kërkon ndjesë aktivistëve të ASH-së për bashkëpunimin e mëparshëm me lidershipin aktual dhe u bën thirrje që të mos bien pre e “përrallave” për ndarje listash dhe dalje të vetme në zgjedhje:
“U kërkoj falje aktivistëve të ASH-së që u kam shërbyer këtyre dyve. Në të njëjtën kohë, u bëj thirrje atyre që janë mashtruar nga përrallat për lista të ndara dhe dalje të vetëm në zgjedhje, të distancohen nga tradhtarët dhe të refuzojnë çburrnimin.”
Fetai e përmbyll reagimin e tij me një paralajmërim politik:
“Tetori do të jetë VLEN dhe bashkë do të festojmë gjatë tërë Nëntorit të shqiptarëve.”