Partia e majtë maqedonase Levica ka shpallur kandidatin e saj për komunën e Strugës, duke nxitur reagime të ashpra nga radhët e VLEN-it në këtë qytet.
Sipas VLEN-it, kjo lëvizje përbën një “pazar të fshehtë” që rrezikon të dëmtojë kandidatin e tyre të pavarur, Mendi Qyra, i cili gëzon mbështetjen edhe të VMRO-DPMNE-së. Përfaqësues të VLEN-it kanë akuzuar se me këtë vendim, Levica po i hap rrugë skenarëve për “shitjen e Strugës”.
Nga ana tjetër, fakti që Levica ka nxjerrë kandidat në Strugë ka ushqyer spekulime dhe dyshime të mëtejshme. Zyrtarë të VLEN-it kanë shprehur shqetësimin se pas kësaj mund të fshihet një marrëveshje e heshtur mes VMRO-së dhe Levicës, ku Struga përdoret si kartë politike, ndërsa mbështetja mund të kërkohet në këmbim për zgjedhjet në Kërçovë.
Pavarësisht akuzave, mbetet e paqartë nëse ky zhvillim do të ndikojë realisht në balancat elektorale në Strugë, apo nëse bëhet fjalë për një përplasje tipike parazgjedhore.