Përjashtimi i shqiptarëve nga institucionet shtetërore – një prirje shqetësuese
Të dhënat e fundit që vijnë nga Ministria e Mbrojtjes nxjerrin në pah një përjashtim të qartë dhe të pajustifikueshëm të shqiptarëve nga përfaqësimi institucional. Nga gjithsej 120 vendime për emërime në pozita të nënoficerëve, vetëm 14 janë shqiptarë.
Një përfaqësim i tillë jo vetëm që nuk reflekton realitetin demografik të vendit, por përbën një precedent të rrezikshëm që nxit përjashtimin sistematik të shqiptarëve nga strukturat shtetërore, përfshirë edhe ato të sigurisë kombëtare.
Ky nuk duket të jetë një rastësi administrative, por pjesë e një vazhdimësie të politikave diskriminuese që, në emër të reformave dhe barazisë, po thellojnë pabarazinë. Kjo prirje e margjinalizimit të shqiptarëve nga vendimmarrja dhe institucionet përbën një rrezik serioz për kohezionin shoqëror dhe funksionimin demokratik të shtetit.
Përfaqësimi i drejtë dhe proporcional është jo vetëm kërkesë kushtetuese, por edhe domosdoshmëri në një shtet shumëetnik si Maqedonia e Veriut. Shqiptarët përbëjnë 29.52% të popullsisë sipas të dhënave zyrtare, dhe çdo devijim nga ky realitet në përfaqësim është i papranueshëm dhe dëmton legjitimitetin e institucioneve shtetërore.
Prandaj, është urgjente që të ndërpriten praktikat përjashtuese dhe të sigurohet përfshirja e barabartë e të gjitha komuniteteve në institucionet e vendit.