Assesi të hapet çerdhja për fëmijë në komunën e Haracinës, ndonëse objekti tashmë një kohë ta gjatë është gati. Prindërit detyrohen të harxhojnë të holla shtesë për t’i dërguar fëmijët në çerdhet më të afërta të qytetit. Por ku qëndron problemi!?
Kryetari i kësaj komune Ridvan Ibrahimi, fajin e hedh te ministria e Politikës Sociale, Demografisë dhe Rinisë, ku ministër është Fatmir Limani.
Kërkuam përgjigje nga ministri Limani por përgjigje nuk morëm. Ndërkohë para 10 ditëve kur e takuam në një ngjarje e pyetëm për këtë temë, ndërsa ai topin e hodhi te ministria e financave.
Megjithatë çerdhja e Haraçinës nuk është e vetmja që nuk po hapet. Edhe në Çair objekti i çerdhes Bambi është gati, por ja që ende nuk ka nisur me punë. Ndërkohë më herët është raportuar se duhet të bëhen edhe 30 punësime për çerdhen Rilindja në Tetovë. Kjo çerdhe është ndërtuar me mjete të Bashkimit Europian, me një kapacitet për 153 fëmijë.