Shkup, 22 Korrik 2025 – Ish-ministri i Punëve të Jashtme, Bujar Osmani, ka zyrtarizuar sot kandidaturën e tij për kryetar të Komunës së Çairit. Vendimi, siç shprehet ai, ka ardhur pas konsultimesh të gjera dhe reflektimi të thellë, si dhe në bashkëpunim me bashkëpunëtorët dhe përkrahësit e tij të afërt.
“Pas shumë konsultimesh dhe një reflektimi serioz, vendimin e morëm së bashku me njerëzit që më qëndrojnë afër, ta ofroj përkushtimin tim dhe ta kërkoj besimin për ta udhëhequr komunën tonë”, u shpreh Osmani.
Ai theksoi se kandidimi i tij nuk ka të bëjë me një funksion të thjeshtë politik, por me ndjenjën e përgjegjësisë ndaj komunitetit ku është rritur dhe jeton. Në deklaratën e tij, Osmani vuri në pah nevojën për “ndryshime të vërteta, të thella dhe njerëzore” në Çair, duke kritikuar gjendjen aktuale në komunë.
“Qytetarët e Çairit nuk e meritojnë të jetojnë në kushte të mjerueshme dhe të pasigurta, nuk meritojnë të injorohen e të nënçmohen”, u shpreh ai, duke shtuar se synon ta rikthejë dinjitetin e komunës dhe të hapë një “faqe të re me një derë që kurrë nuk do të mbyllet për qytetarët”.
Osmani tha se për të, kjo është një sfidë personale dhe politike njëkohësisht, që lidhet me të ardhmen e fëmijëve dhe gjeneratave të reja në Çair. Ai shprehu falënderim për përkrahjen e marrë deri tani nga qytetarët, strukturat partiake dhe bashkëpunëtorët e tij.
“Çairi e pret ndryshimin dhe atë do e sjellim!”, përfundoi Osmani, duke nisur kështu zyrtarisht fushatën për zgjedhjet lokale.