Shkup – Aleanca për Shqiptarët ka reaguar ashpër ndaj deklaratave të kryeministrit Hristijan Mickoski për Ushtrinë Çlirimtare Kombëtare, duke i cilësuar ato si “skandaloze” dhe “provokim të hapur” ndaj shqiptarëve.
Në reagim, partia e akuzon Mickoskin për mohim të një pjese të historisë shqiptare dhe për veprime që rrezikojnë stabilitetin ndëretnik dhe procesin e integrimit evropian të vendit.
Aleanca kritikon edhe partnerët shqiptarë në qeveri për heshtje dhe relativizim të çështjes, duke i akuzuar se kanë vepruar kundër interesave të shqiptarëve edhe më herët.
Sipas saj, deklaratat e Mickoskit mund të tensionojnë marrëdhëniet mes bashkësive dhe të dëmtojnë kohezionin shoqëror në vend.
ASH:
Deklaratat e kryeministrit Hristian Mickoski për Ushtrinë Çlirimtare Kombëtare janë skandaloze dhe provokim i hapur ndaj ndjenjave kombëtare te shqiptarëve në përgjithësi.
Pas zhbërjes së shumë të drejtave dhe të arriturave të deritanishme, Mickoski tani tenton edhe ta mohojë dhe ndalojë një pjesë të lavdishme të historisë tonë. Ne e kemi pritur dhe paralajmëruar rrezikun se kjo Qeveri antishqiptare do të arrijë deri këtu dhe të gjitha veprimet tona kanë qenë pikërisht në frymën e parandalimit me kohë të një momenti si ky. Por ajo që edhe më shumë na shqetëson është heshtja e shqiptarëve në Qeveri të cilët siç duket edhe këtë duan ta kalojnë me relativizime dhe ndoshta edhe me sulme ndaj shqiptarëve siç kanë bërë deri më tani.
Deklaratat e kryeministrit Mickoski janë sa ofenduese për shqiptarët aq edhe të rrezikshme për stabilitetin e vendit, kohezionin ndëretnik, tensionimin e marëdhënieve mes bashkësive dhe të ardhmen europiane të vendit.
– Aleanca për Shqiptarët