Tetovë, 30 korrik 2025 – Dega e Aleancës për Shqiptarët në Tetovë ka reaguar me tone të ashpra ndaj kryetarit në largim të Komunës së Tetovës, Bilall Kasami, duke e akuzuar atë për privatizim të pronave publike dhe për përgatitje për shitjen e sistemit të ujësjellësit.
Në reagimin e publikuar, ASH Tetovë thekson:
Se Kasami ka privatizuar të gjitha pronat publike, duke i shitur ato për çmime “qesharake”.
Se po planifikon ta privatizojë edhe ujësjellësin e qytetit, duke e dhënë në duar të një kompanie private.
Kompania private, sipas ASH-së, do të vendosë vetëm aparate matëse të konsumit të ujit, ndërsa çmimi i ujit pritet të rritet ndjeshëm.
Të ardhurat, sipas tyre, do të përfundojnë në kompani private dhe te njerëz të afërt me kryetarin Kasami dhe subjektin e tij politik.
Sipas ASH, Tetova ka ujë të mjaftueshëm, por nevojitet ndërhyrje në rrjetin e amortizuar të furnizimit me ujë.
Ata theksojnë se paratë aktuale nga taksat janë të mjaftueshme për të bërë investimet e nevojshme, dhe se privatizimi nuk ka justifikim ekonomik, por është “plaçkitje” dhe “përfitim personal”.
ASH i bën thirrje qytetarëve dhe opinionit të reagojnë kundër kësaj që e quan “abuzim me pasurinë publike”.