Ministria e re e Energjetikës, Minierave dhe Burimeve Minerale (MEMBM), e formuar nga Qeveria aktuale e udhëhequr nga VMRO-VLEN, ka shpallur 20 punësime të reja – 19 për maqedonas dhe vetëm 1 për shqiptar. Ky raport skandaloz i përfaqësimit etnik vjen si vazhdimësi e trendeve të punësimeve të njëanshme dhe eliminimit të shqiptarëve nga administrata shtetërore.
Kjo ministri, që nga themelimi i saj, është perceptuar si një institucion i kontrolluar ekskluzivisht nga VMRO-DPMNE dhe sipas vëzhgimeve të fundit, është kthyer në simbol të përjashtimit institucional të shqiptarëve në Maqedoninë e Veriut.
Situata është alarmante edhe në institucione të tjera, ku me ardhjen e Qeverisë aktuale, janë punësuar me mijëra maqedonas, ndërsa shqiptarët janë lënë jashtë ose janë larguar nga vendet e punës përmes ndërprerjes së kontratave.
“Po zbatohet një strategji sistematike e deshqiptarizimit të institucioneve. Ky është diskriminim i pastër dhe shkelje flagrante e Marrëveshjes së Ohrit,” thuhet në reagimin e Aleancës për Shqiptarët, e cila kërkon transparencë dhe rikthimin urgjent të mekanizmit të balancimit etnik.
Për më tepër, partia paralajmëron se heshtja e komunitetit ndërkombëtar ndaj këtij zhvillimi e bën këtë proces edhe më të rrezikshëm për paqen ndëretnike dhe stabilitetin demokratik në vend.