Ish-anëtari i Aleancës për Shqiptarët, Arben Hudi, ka reaguar ashpër ndaj ish-ministrit të Shëndetësisë, Arben Taravari, duke e akuzuar për hipokrizi politike, hakmarrje dhe papërgjegjësi ndaj personelit mjekësor.
Në një postim të publikuar sot, Hudi shkruan se arsyet e largimit të Taravarit nga qeveria nuk kanë të bëjnë me parime, por me interesa personale, ndërsa i hedh poshtë pretendimet e tij për kujdes ndaj personelit shëndetësor.
“Ju nuk keni aspak të drejtë të shisni moral dhe të shtireni sikur ndjeni dhembshuri për personelin mjekësor. Fati i tyre ishte në duart tuaja deri para disa ditësh. Ju nuk i përfillët kërkesat e tyre me vite, duke i lënë pa rroga e pa kontrata,” shkruan Hudi.
Ai e sfidon Taravarin të rendisë ndonjë arritje gjatë kohës kur ishte ministër i Shëndetësisë, duke thënë se e vetmja trashëgimi e tij janë skandalet, korrupsioni dhe hakmarrja politike.
“Me urdhërin tuaj ndodhi largimi i shqiptarëve nga puna, shumë prej tyre për hakmarrje politike, siç ndodhi edhe me mua, vetëm pse isha në krah të Ziadin Selës. Por kështu ndodhi edhe me shumë të tjerë,” përfundon reagimin e tij Hudi.
Reagimi vjen në një kohë të tensionuar brenda strukturave të ish-Aleancës për Shqiptarët, ku pas ndarjes me qeverinë, përplasjet mes ish-bashkëpunëtorëve janë shtuar.