📍Pas vendimit të Qeverisë së Maqedonisë së Veriut për të shpërblyer dy klube dhe 22 sportistë, të gjithë të përkatësisë maqedonase, ka ardhur një reagim diplomatik, por mjaft domethënës nga Ambasada e Shqipërisë në Shkup.
Ambasadori shqiptar Denion Meidani zgjodhi një mënyrë të veçantë për të dhënë një mesazh të qartë kundër përjashtimit të sportistëve shqiptarë në shpërblimet zyrtare: ai priti në Ambasadë futbollistin Nedim Bajrami, një nga figurat më të suksesshme shqiptare në arenën ndërkombëtare, me origjinë nga Maqedonia e Veriut.
Në një postim në rrjete sociale, ambasadori shprehu krenarinë për Bajramin dhe theksoi me nëntekst ironik se “jo gjithmonë na vlerësojnë si më të mirët, por më të mirë se ne… nuk ka.”
“Sot në Ambasadë pata kënaqësinë të pres me përzemërsi Nedim Bajramin, një djalë shembullor, brenda dhe jashtë fushës. Me origjinë nga Maqedonia e Veriut dhe fanellën kuqezi në zemër, Nedim është simbol i përkushtimit, karakterit dhe sportivitetit që na bën të gjithëve krenarë,” – shkruan ambasadori Meidani.
Ky gjest vjen në një kohë kur komuniteti shqiptar në Maqedoninë e Veriut ka shprehur pakënaqësi për mungesën e përfaqësimit dhe vlerësimit institucional, përfshirë në fushën e sportit, ku shumë prej tyre kanë arritur suksese të dukshme – shpesh jashtë sistemit shtetëror të mbështetjes.