Në orët pasi Izraeli nisi valën e parë të sulmeve kundër Iranit më 13 qershor, duke vrarë udhëheqës të lartë ushtarakë dhe shkencëtarë bërthamorë, operativët e Inteligjencës izraelite nisën një fushatë të fshehtë për të frikësuar zyrtarët e lartë iranianë me qëllimin e dukshëm të përçarjes dhe destabilizimit të regjimit teokratik të Teheranit, sipas tre personave të njohur me operacionin.
Njerëzit që punojnë për shërbimet e sigurisë së Izraelit, që flasin persisht, gjuhën kryesore të Iranit, i telefonuan zyrtarët e lartë iranianë në celularët e tyre dhe i paralajmëruan se edhe ata do të vdisnin nëse nuk pushonin së mbështeturi regjimin e Ajatollah Ali Khamenei-t, udhëheqësit suprem të Iranit, sipas tre personave, të cilët folën me kusht anonimiteti për të diskutuar operacionet klandestine. Njëri prej tyre vlerësoi se u kontaktuan më shumë se 20 iranianë në pozicione pushteti.
The Washington Post siguroi një regjistrim audio dhe transkript të një telefonate të tillë, e cila u zhvillua të njëjtën ditë, më 13 qershor, kur Izraeli filloi bombardimin e Iranit.
“Mund t’ju këshilloj tani, keni 12 orë për t’u arratisur me gruan dhe fëmijën tuaj. Përndryshe, jeni në listën tonë tani”, i tha një operativ i Inteligjencës izraelite një gjenerali të lartë iranian afër sundimtarëve të vendit, sipas regjistrimit audio. Operativi më pas sugjeroi se Izraeli mund të ekzekutonte gjeneralin dhe familjen e tij në çdo moment.
“Ne jemi më afër jush sesa vena juaj e qafës. Vendoseni këtë në kokën tuaj. Zoti ju ruajttë”, tha ai.
Gjeneralit, një anëtar i Korpusit të fuqishëm të Gardës Revolucionare Islamike të Iranit, iu tha se kishte 12 orë për të bërë një video ku distancohej nga qeveria iraniane.
“Si duhet t’jua dërgoj?”, përgjigjet gjenerali.
“Do t’ju dërgoj një ID në Telegram”, thotë operativi, duke iu referuar aplikacionit të mesazheve Telegram. “Dërgojeni”.
Nuk është e qartë nëse një video e tillë është bërë apo dërguar. Gjenerali besohet të jetë ende gjallë dhe në Iran, tha një nga njerëzit e njohur me operacionin. Por një qëllim kryesor i operacionit ishte të dekurajonte dhe ngatërronte udhëheqjen e Teheranit, tha një person i dytë. Zyra e kryeministrit izraelit Benjamin Netanyahu nuk iu përgjigj një kërkese për koment.
Regjistrimi audio dhe një transkript në gjuhën angleze u vunë në dispozicion nga një individ izraelit i cili e mori materialin dhe e ndau atë me The Post, së bashku me një përshkrim të një telefonate të dytë të tillë me një zyrtar tjetër të lartë iranian pranë Khameneit. The Post përgatiti transkriptin e vet në gjuhën angleze të regjistrimit audio gati katër-minutësh të bisedës, i cili u zhvillua në persisht.
Individi që siguroi regjistrimin tha se përmbajtja e audios nuk ishte manipuluar në asnjë mënyrë, përveçse për të maskuar zërin e operativit të inteligjencës izraelite për të mbrojtur identitetin e tij. The Post mori emrin e gjeneralit iranian, por nuk po e publikon atë dhe e ka hequr zërin e tij nga regjistrimi për të fshehur identitetin e tij.
Telefonatat me figurat e larta ushtarake dhe të sigurisë iraniane ishin një nyje e asaj që zyrtarët izraelitë të sigurisë e kanë përshkruar si një fushatë të gjerë veprimi të fshehtë që plotësoi sulmin ushtarak të Izraelit ndaj vendeve bërthamore, objekteve të prodhimit të armëve dhe lëshuesve të raketave.
Operacioni i përgjithshëm, i quajtur “Luani në Ngritje” (Rising Lion) nga Qeveria izraelite, mbështetej në aktivizimin e ekipeve klandestine të inteligjencës, depove të armëve të paravendosura dhe aftësive të tjera që kishin mbetur të fjetura brenda territorit iranian për javë të tëra ose edhe muaj, thanë zyrtarët izraelitë.