Skender Rexhepi Zejd nga Fronti Europian në Daily Click tha se kushdo që bëhet pjesë e qeverisë së ardhshme me VMRO-DPMNE-në, do të jetë e kotë nëse nuk realizohen ndryshimet kushtetuese. Ai shtoi se liderët e VLEN-it “po i hanë fjalët e tyre” në lidhje me marrëveshjen mes partive politike shqiptare për të mos hyrë në qeveri pa ndryshimet kushtetuese.
“Edhe ai tjetri që nuk e di a është nënshkrues apo nuk është nënshkrues, ai e di shumë mirë që është nënshkrues , por megjithatë, në vend se ta demantojmë ne… TV21: Pse nuke fotografuat atë fletën ku janë nënshkruar që ta postoni në rrjete sociale, ose të na dërgoni neve si media? Po nuk ka nevojë, a ishte në emisionin e juaj Taravari që e konfirmoi se është nënshkruar një dokument i tillë, bile tha se ka qenë nisma e tij, si iniciatorë ai ka qenë për një dokument të tillë, për një marrëveshje xhentellmene të firmosur me shkrim me gjithçka. Thjesht ata e tërhoqën, e hëngrën fjalën e tyre në ditën që u joshën me pushtet, me pushtet servilizmi dhe nëse ata e kanë hëngër këtë fjalë, çfarë mendoni ju, se do të presin 3 muaj, 6 muaj, këtu vendos VMRO-ja”, tha Skender Rexhepi zejdi, Fronti Europian.
Nga VLEN paraprakisht thanë se do të angazhohen që ndryshimet kushteteuse të realizohen në 6 muajt e parë të qeverisë, por a ekziston vullnet te VMRO-DPMNE? Bilall Kasami nga VLEN thotë se edhe kjo parti nuk ka dilema në lidhje me integrimin në BE.
“Për vullnetin e VMRO-së, duhet ta pyesni VMRO-në. Ne kemi thënë dhe vazhdojmë të themi që koalicioni VLEN një ndër prioritetet e veta si koalicion e ka ndryshimet kushteteuse dhe vazhdimin e rrugëtimit të Maqedonisë drejt Bashkimit Europian. Sa i përket pra anës tjetër, VMRO-së, sigurisht pra që edhe ata duhet të deklarohen dhe nuk kanë edhe ata dilema sa i përket integrimit drejt BE-së”, theksoi Bilall Kasami nga VLEN.
Ndërkaq dje, kryetari i VMRO-DPMNE-së, Hristian Mickoski paralajmëroi zhvillim të politikës parimore me fqinjët. Si Qeveri e ardhshme, siç tha ai, “nuk do të ndërmarrin hapa të nxituar, të cilët mund t’i kushtojnë shumë shtetit”. Kusht i Maqedonisë së Veriut për hapjen e negociatave për anëtarësim në BE është realizimi i ndryshimeve kushtetuese, ku parashihet futja e pakicës bullgare në Kushtetutë.