Gjenerali amerikan Wesley Clark ka hedhur poshtë akuzat e dikurshme për trafik organesh gjatë luftës në Kosovë, duke i quajtur ato plotësisht të pabaza dhe të fabrikuara. Ai deklaroi se fillimisht kishte menduar se pas këtyre pretendimeve mund të kishte ndonjë provë, por më pas kuptoi se bëhej fjalë për një operacion të pastër dezinformimi të Rusisë.
“Unë mendova se dikush kishte prova konkrete”, tha Clark. “Por sugjerimi se gjatë një fushate ajrore bombardimesh hiqeshin organet e njerëzve dhe shiteshin… kjo është thjesht qesharake. Nuk ka kuptim – dezinformim rus”.
Clark theksoi se këto teori konspirative u përdorën si instrument propagandistik për të njollosur ndërhyrjen e NATO-s dhe luftën e drejtë të popullit të Kosovës. Ai kërkoi që publikimi i këtyre manipulimeve të trajtohet me seriozitet, duke kujtuar se dezinformimi rus ka qenë një mjet i vazhdueshëm për të ndikuar narrativat ndërkombëtare mbi konfliktin.