Pas zhvillimeve të fundit rreth ankesës së përbashkët të VMRO-DPMNE dhe LSDM për rezultatin zgjedhor në Komunën e Çashkës, ka reaguar ashpër Krenar Lloga, i cili e ka cilësuar këtë si një skenar të mirëkoordinuar politik kundër vullnetit të qytetarëve shqiptarë.
Në një reagim të fortë, Lloga ka shkruar:
“‘Makedonija povtorno tvoja’ ose koalicioni i pashpallur i oligarkisë maqedonase VMRO–vLEN–LSDM po bën çmos ta rrëzojë Çashkën. Pasi e falën Butelin për ca vota të qelbura, për t’i fituar shqiptarët në Çair e Saraj, po tentojnë të shesin edhe Çashkën, edhe Kërçovën. Turp e faqe e zezë!”
Ky reagim i Llogës vjen pas nismës së VMRO-së dhe LSDM-së për të dorëzuar një ankesë në Komisionin Shtetëror Zgjedhor (KSHZ), përkundër raportimeve se procesi zgjedhor në Çashkë ka qenë i rregullt dhe demokratik.
Sipas rezultateve zyrtare, kandidati shqiptar Suat Shaqiri ka fituar bindshëm me 2322 vota, duke lënë pas kandidatët maqedonas të LSDM-së dhe VMRO-së.
Burime nga terreni pohojnë se përpjekjet për kontestimin e rezultatit synojnë të vonojnë certifikimin e fitores së Shaqirit, e cila shihet si një simbolikë e fortë e përfaqësimit shqiptar në zemër të rajonit të Vardarit.
