Gazetari i sportit, Dritan Shakohoxha dhe kolegët e tjerë nga Shqipëria janë mbajtur për rreth tri orë në aeroportin e Beogradit nga policia serbe.
Shakohoxha e ka konfirmuar se ai me kolegët e tij janë mbajtur shumë gjatë në aeroport, teksa siç shkruan TCh, Shakohoxha ishte në listën e zezë bashkë edhe me drejtorin e sportit në Artmotion, Arlind Sadikun.
“Ishte sërish një situatë absurde. Më morën pasaportën mua dhe disa kolegëve të tjerë nga Shqipëria dhe nuk na jepnin asnjë shpjegim. Më pas pashë emrin tim, të Arlind Sadikut, Marin Memës dhe disa gazetarëve të tjerë nga Shqipëria që ishin aty dhe na kishin futur në një lloj liste të çuditshme. Na pyesnin vazhdimisht se ‘Për çfarë kishim shkuar në Beograd?’. Largoheshin. Vinin prapë: pyesnin, iknin prapë. Një marrëzi e pafund. Deri sa në fund na lejuan të largoheshim”, tha Shakohoxha, shkruan TopChannel, transmeton Klankosova.tv.
Kurse, në lidhje me mungesën e flamurit kuqezi në seancën stërvitore të Shqipërisë përpara sfidës së nesërme ndaj Serbisë, Federata Serbe ka thënë se kanë dashur të evitojnë ndonjë incident nga “dikush dashakeq”.
Federata Serbe e Futbollit theksoi se flamuri kuqezi do të vendoset nesër në stadium përpara ndeshjes dhe do të jetë aty gjatë gjithë takimit.